જીવવા બંધાયો

ઝીંદગીની રાહમાં ડગ માંડવા એની સાથે મંડાયો છુ ,

દરેક પળમાં સાથ આપવા એની સાથે જોડાયો છું ;

 

લાગણી ના તાંતણાથી એની સાથે વણાયો છું

વિશ્વાસ ની દોર થી એની સાથે જકડાયો છું

 

મીઠી વાતો સાંભળવા એની સાથે ભીંજાયો છું ,

મીઠું સ્મિત જોવા એની સાથે ઘવાયો છું ,

 

ખુશી વધારવા એની સાથે છવાયો છું

ગમ ઘટાડવા એની સાથે દુખાયો છું

 

હર પળ ખુશ જોવા એની સાથે બદલાયો છું

ગુમશુદા ઝીંદગી જીવવા એની સાથે બંધાયો છું

હાસ્યનું રહસ્ય .

કેવા-કેવા ઈશારા કરી માંગે ઈ તો ભીખ ,

દોઢ ફૂટનું બાળક જોઈ મળે કંઈક શીખ ;

ફાટલું તુટલું બુશર્ટ તેનું  ઠિગળાળું છે પેન્ટ ,

જોઈ માસુમિયત આપે સૌ કોઈ દસની નોટ;

રસ્તા પર દોડી હાથ પકડી કરે કેવો ઈશારો ,

જતા આવતા સૌ કોઈ ને લાગે ઈ બિચારો ;

કોઈ મોઢું ફેરવેને, મારે ધકો. તોય મુખડુ મલ્કાવતો ,

હાથ ખંખેરી ઉભો થતો વાટકો લઇ હૃદય હરકાવતો ;

કોઈ આપે કે ,ન આપે રહેતું મુખ પર અતુંલ્ય હાસ્ય ,

‘ગુમશુદા’ ઈચ્છા થાય છે. જાણવાની એનુ આ રહસ્ય ;

આપવીતી

સ્થિંતિ હતીં વસમી જ્યારે હતું ન પાસે કંઈ ગુમાવવા

માગવા જતા પારકા થઇ પોતાના નીકળી જાય છેં.

 

ઠોકર ખાતો દુનિયાની ભટકતો અહીં તહીં

પોતાના જ પાસે આવી ધુત્કારી નીકળી જાય છેં.

 

દુનિયા સામે ખોટો મોભો લઇ વાતો કરતા લોભામણી

વખત આવતાજ દુર્જનની જેમ સ્વજન નીકળી જાય છેં.

 

વલખા મારી ભટકતો ચારેકોર માંગતો હતોં કઈ પામવા

નસીબના ખેલ કેવા? સૌ હાથતાળી દઈ નીકળી જાય છેં.

 

‘ગુમશુદા’ લખતા આપવીતી ની વાતો ભીંજાયો છે કાગળ

કલમ શું કરે. જયારે શબ્દો પણ ભીનાં નીકળી જાય છેં.

આવ્યો છે! વરસાદ

ધરા કેરા મિલન માટે મુસાફિર બનીને આવ્યો છે! વરસાદ

માટીમાં ભળવા માટે સોડમ બનીને આવ્યો છે! વરસાદ

બાળકો ભીનજવવા  મસ્તીખોર બનીને આવ્યો છે! વરસાદ

વડીલો માટે  આશીર્વાદ બનીને આવ્યો છે! વરસાદ

ગરીબો માટે બેઘર બનીને આવ્યો છે! વરસાદ

અમીરો માટે મહેફિલ બનીને આવ્યો છે! વરસાદ

પ્રેમીઓ માટે ભુલાયેલા સ્મરણો બનીને આવ્યો છે! વરસાદ

દોસ્તો માટે વીતેલું બાળપણ બનીને આવ્યો છે! વરસાદ

ખેડુતો માટે કામકાજ બનીને આવ્યો છે! વરસાદ

વેપારી માટે નવરાશ બનીને આવ્યો છે! વરસાદ

દરિયા માટે ખારું નીર બનીને આવ્યો છે! વરસાદ

ગંગા માટે ગંગાજળ બનીને આવ્યો છે! વરસાદ

આજે તો ઈ મન મૂકીને વરસવા આવ્યો છે! વરસાદ

‘ગુમશુદા’ તારા માટે ગઝલ બનીને આવ્યો છે! વરસાદ

બેવફાઈ નો રંગ

તમે ઠેસ કેવી પહોંચાડી હશે એ વખતે મને

કે તમે સામા મળ્યા તો પણ નજર મેળવી ના શક્યો.

તમે કાળજું કેવું બાળ્યું હશે મારુ

કે તમને હસતા જોઈ હુ હસી ના શક્યો.

તમે કેવો તે દર્દ આપ્યો હશે એકલતા નો

કે તમને રડતાં જોઈ હુ રડી ના શક્યો.

તમે કેવો તે રંગ લગાવ્યો હશે બેવફાઈ નો

કે તમને જતા જોઈ હું રોકી ના શક્યો.

એ ભરી મહેફિલમાં તો પાછળ જ  હતો તમારી

છતાં પણ હિમ્મત કરી તમને બોલાવી ના શક્યો.

આજ પણ એક જ સવાલ છે મારા મનમાં

કે કેમ એ દિવસે તમને મારા મનની લાગણી કહી ના શક્યો.

લોકો કહે છે. એવું તે શું જાદુ કર્યું હશે ? તમે

કે આજ પણ  ‘ગુમશુદા’ તમારો ભૂતકાળ ભૂસી ના શક્યો.

 

હોળી નો રંગ

પાણીની પિચકારી લઇ હાથમાં રંગની થેલીના સંગમાં,

ટુકડી ઉપડી રંગવા સૌને આ હોળી કેરા રંગમાં…

વ્રુધો બાળકો ને યુવાન આજ છે ફૂલ ગેલમાં,

લાગે છે આજે સૌ કોઈ રમશે આ હોળી કેરા રંગમાં…

નાત-જાત ભૂલી ને આજે સૌ કોઈ છે આનંદમાં,

મનની કડવાશ ભૂલી સૌ કોઈ રમશે આ હોળી કેરા રંગમાં…

રંગથી રંગાયેલા છે સૌના ચહેરા છતાં છે સૌ કોઈ મસ્તીમાં,

ભીડભાડમાં ‘શ્રી’ તને શોધતો તારા હાથે રંગવા આ હોળી કેરા રંગમાં…

ઝીંદગી ની રમત

ઝીંદગીની અનેરી પગદંડીમાં માનવ મળ્યા અનેક

હવે તો ખોટા સાથે પણ સાચા થતા આવડી ગ્યું છે.

જોયા છે આ મુસાફરી માં અનેક વળાંક

હવે તો દુઃખ માં પણ હસતા આવડી ગ્યું છે.

સમજતા સમજતા આ ઝિંદગીના પાસા

હવે તો પોતાને પણ પાસા ફેકતા આવડી ગ્યું છે.

ઝીદગીમાં કેટલા જોયા છે ચઢાણ-ઉતાર

હવે તો સમય સાથે ઢળતા આવડી ગ્યું છે.

હવે તો નથી ફેર પડતો દુઃખ હોય કે સુખ, ખુશી હોય કે ગમ

ઝીદગી ની આ અદભૂત રમતમાં

હવે તો લાગણીઓ ને લખતા આવડી ગ્યું છે.

તને જોવા નો મોકો

પતંગ ઉડાવવા લોકોને રાહ હતી પવનના એક ઝોકાની,

પણ મને તો રાહ હતી અગાસી પર તને જોવાના એક મોકાની ;

રંગબેરંગી પતંગોથી  સજેલું આ અનેરું અવકાશ,

પણ તને જોતા જ હું થઇ જતો શૂન્યાવકાશ ;

પતંગ ઉચે ઉચે ઉડતો અને આખા આકાશમાં વિહરતો,

પણ બધું મૂકી હું તો ફક્ત તને જ નિહારતો ;

કાલથી નય હોય આકાશમાં રંગબેરંગી પતંગો,

પણ મારા હૃદયમાં હશે ફક્ત તારા જ તરંગો ;

તારી સુંદરતા!!!

પહેલી નજરમાં જોતા તારા રૂપ પર થયો હાવી,

લાગ્યું કેમ હવે તો તુજ છે મારુ ભાવી;

પ્રકૃતિથી પણ સુંદર એ રૂપ તારું,

જોતા જેણે મન મોહી લીધું છે મારુ;

તારા ચહેરાની કેવી તે છે ઈ નિખાલસતા,

જેને જોઈ હું ભૂલ્યો છુ સભ્યતા;

કેવી છે તારી આંખોની  નમી,

જોતા જે  લાગે છે પવિત્ર અમી;

તારા ગાલ પરનું એ મીઠકડું હાસ્ય,

જેને જોતા જ દેખાયું છે એમાં મારુ ભાગ્ય;

કેવી તે તારી સુંદરતાની અજીબ ખુશનુમાં,

જેને હું ન વર્ણવી શકુ મારા શબ્દમાં;

ખબર પડી જ્યારે કે તું ‘ તો  છે કોઈ બીજાની અમાનત,

હવે શું હોય બીજું , હું રહીશ તારા પ્રેમ થી અનામત;

ગામડા ની સવાર

કુદરત ના ખોળાની ઈ-પ્રભાત,

ગામડાની અદભુત કેવી છે  ઈ-સવાર;

છાશ કેરા વલોણા નો ઈ-અવાજ,

પક્ષીઓ નો કેવો છે ઈ-શૌરબકોર;

મંદિર કેરા નગારાનો ઈ-રણકાર,

નદીના વહેણ નો કેવો છે ઈ-–ખળખળાટ;

ઉડી રહેલા ભમરા નો ઈ-ગણગણાટ,

ખેતરમાં કાબરનો કેવો છે ઈ-કિલકિલાટ;

શિયાળુ ઠંડા પવન નો ઈ-સડસડાટ,

ચુલામાં બળી રહેલ લાકડા નો કેવો છે ઈ-તડતડાટ;